Ondan kos Obo Manobo?

Ondoy man iddos mgo minuvu no Obo Manobo?. Inaayun  en iddon intud, "mokoponayun bo idda no grupu?” Dos Obo Manobo od pokoponayun woy Tribu idda no disok no grupu nod kokita diyon to boovahan (North) woy boovahan to kowanan woy ivang ( South) pommuvungan to Sondawa diyot lindiru to Davao del Sur woy North Cotabato. Diyot livuta to Mindanao, Pilipinas. Osso po tadda to Obo Manobo duwon mandad id ngoranan no: Kidapawan Manobo, Obo  Bagobo, woy Bagobo. Dos id ngaran kandan Monuvu  o Manobo,  dos kinohiyan no Obo Manobo duma no mgo panga to Pilipinas diyon to Austronesian no kinohiyan no  od osengon daom tat 50,000 po-undiyot 80,000 no mgo minuvu. De-en ko-ilangan nod  poomdommon ta iddos dontulon  no Obo Manobo no mgo minuvu. Diyon to kodkakap ni Richard Elkins, duwon mgo oruwon puu no Monuvu no nokod-osso-ossa kos kinohiyan.

Inis Monuvu konna dakkoo no grupu, waa mandad ini noko lommung diyon to ko-urallan. Konna mandad mgo moyaman sikandan otik korotuwan kos od hisgutan. Konna iling taddot, ponunggeleng : diyot Monila duwon dakkoo nod bovaa to mgo motoos no mgo ogget, ko konna od bovaa ra to mounayan no mgo ogget iling to kod-avoo woy dos duma od povovaa ra mandad su konna langun od kotuwig tadda.Iddos moppiya no botosanon iling to movasa, mo-olit-olit, moppiyon koroniyan to pomilya woy dos kod-addat to mgo buyyag idde-en kos oraroy no dakkoo kos koru-anon atag kandan. Diid kopiyan to samuk, duwon allak to mgo morat no ispiritu, duwon lanu atag to bohok woy kopotayan woy dos kod-isau to allow-allow no ko-ubpa  woy mgo kohirapoy. Na, ini-en kos nokod-ossa-ossa nod isoowwon to keton ko-ontayan, de-en ini-en mandad kos id pomonnan to keton nokod-ossa-ossa no batok to keton ogget. Dos ossa-osson mahatow no batok to keton ogget, idde-en kos kohulugan to nokod-ossa-osson od isoowwon to keton ko-ontayan diyot allow-allow to keton kod-ubpa.